Нават на "Куфары" прадаюць: навукоўцы хочуць змагацца з "чорнымі капальнікамі"
Металашукальнік / pixabay
Інстытут гісторыі Нацыянальнай акадэміі навук прапануе абмежаваць магчымасць беларусаў карыстацца металашукальнікамі, піша агенцтва "Мінск-Навіны". Так навукоўцы спадзяюцца перамагчы "чорных капальнікаў".
"Ты можаш іх купляць, хочаш — прадавай, але выкарыстоўваць можна толькі ў навуковых або спецыяльных мэтах. Напрыклад, МНС, вайскоўцамі. Так, як сёння прынята карыстацца квадракоптэрамі", — тлумачыць сваю ідэю дырэктар Інстытута гісторыі Вадзім Лакіза.
Ён кажа, што археалагічныя артэфакты цяпер можна купіць праз папулярныя інтэрнэт-пляцоўкі. Яны прадаюцца нават на "Куфары", наракае дырэктар Інстытута. І прапануе таксама ўвесці абмежаванні для анлайн-рытэйлераў, праз якія "чорныя капальнікі" могуць збываць знойдзены тавар. Па законе археалагічныя артэфакты належаць дзяржаве, і за іх продаж прадугледжана адказнасць.
