Археалагічны музей пад адкрытым небам створаць на Менцы

На гарадзішчы на Менцы плануюць адкрыць археалагічны музей пад адкрытым небам. Прапановы па музеефікацыі комплексу ва ўрад мяркуюць падаць да траўня. Пра гэта на прэс-канферэнцыі 6 лютага паведаміў дырэктар Інстытута гісторыі НАНБ Вадзім Лакіза.

"Існуе папярэдняя архітэктурная канцэпцыя, якую падрыхтавалі архітэктары па нашых ідэях. Зараз трэба, каб на гэтым месцы з'явіўся археалагічны музей пад адкрытым небам. Праца вядзецца, Міністэрства культуры выступае яе каардынатарам. Да траўня мы занясем ва ўрад прапановы па музеефікацыі і развіцці комплексу", — цытуе БЕЛТА словы Лакізы.

Гісторык падкрэсліў, што ў выніку раскопак упершыню даказана існаванне абарончай сцяны старажытнага горада X—XI стагоддзяў.

"Сцяна вышынёй 5-6 метраў з дубовымі канструкцыямі захавалася на плошчы прыблізна 900 метраў. Мы яе раскапалі, але гэтага мала: трэба захаваць, закансерваваць. Ёсць спецыялісты, якія дапамагаюць гэта зрабіць: правялі лідарную здымку, зафіксавалі, цяпер драўляныя канструкцыі знаходзяцца ў гомельскай арганізацыі, якая займаецца кансервацыяй сумесна з навукоўцамі", — удакладніў дырэктар Інстытута гісторыі.

Паводле яго, летась на раскопках на Менцы пад кіраўніцтвам навукоўцаў паспелі папрацаваць 500 студэнтаў-валанцёраў з 17 ВНУ, якія праходзілі практыку.

Для музея на гарадзішчы хочуць узнавіць жылыя і гаспадарчыя пабудовы, уваходную групу, абарончыя канструкцыі, аднавіць вал.

Першая летапісная згадка пра Мінск датуецца сакавіком 1067 года. Кіеўскія князі, якія ваявалі тады з полацкім князем Усяславам Чарадзеем, спалілі летапісны Менск. Мяркуецца, што тагачасны горад размяшчаўся на рацэ Менцы ў раёне цяперашняй вёскі Гарадзішча ў Мінскім раёне.