На сузаснавальніка Wargaming пачнуць завочную крымінальную справу

Сузаснавальніка кампаніі Wargaming Мікалая Кацалапава вінавацяць у "фінансаванні экстрэмістаў і тэрарыстаў". За гэта на яго ў Беларусі пачнуць завочную крымінальную справу — так званую "спецвытворчасць", паведамілі на дзяржаўным тэлеканале АНТ.

У прапагандысцкім фільме тэлеканала заявілі, што Кацалапаў некалькі гадоў данаціў "экстрэмісцкім і тэрарыстычным фондам сотні тысяч долараў" у выглядзе крыптапераводаў.

У студзені 2023-га КДБ уключыў Кацалапава ў "спіс тэрарыстаў". Яго вінавацяць у фінансаванні тэрарызму паводле артыкула 290-1 КК. IT-менеджару пагражае да 12 гадоў пазбаўлення волі.

У СМІ адзначалі, што Кацалапаў стаў самым буйным беларускім бізнесоўцам, якога КДБ дадаў у "тэрарыстычны" спіс. Сам айцішнік даўно пакінуў Беларусь і яшчэ ў сярэдзіне 2010-х перабраўся на Кіпр.

Кампанія Wargaming выказвалася супраць вайны, развязанай Расіяй, і неаднаразова ахвяравала ў падтрымку грамадзян Украіны. Улетку 2022-га яе ўнеслі ў спіс юрыдычных асоб з акцыянерамі з недружалюбных краін.