На АНТ паказалі яшчэ аднаго абвінавачанага ў "фінансаванні экстрэмізму"

На дзяржаўным тэлеканале АНТ анансавалі прапагандысцкі фільм пра "фінансаванне экстрэмізму". Пад гэты артыкул рэжым Лукашэнкі падводзіць грашовыя пераводы на полк Каліноўскага і ў фонды салідарнасці.

У анонсе прадстаўнік Дзяржкантролю Уладзіслаў Ларыёнаў кажа, што летась улады выявілі каля 70 выпадкаў фінансавання "экстрэмісцкай дзейнасці". Сярод атрымальнікаў дапамогі называюцца полк Каліноўскага і Байсол.

Таксама ў анонсе фігуруюць два палітвязні — Міхаіл Фандо (асуджаны на пяць гадоў калоніі) і Аляксандр Дорагакупец (асуджаны на пяць з паловай гадоў калоніі і буйны штраф).

Але прапагандысты называюць і новае імя — Васіль Арэшка. Гэта ўраджэнец Салігорска. У сацсетках не пазначаныя яго ўзрост, але яму калі 30 гадоў, калі меркаваць па ўзросце яго сяброў "Вконтакте", піша "Наша Ніва".

Вядома, што Арэшка працаваў ў Польшчы HR-спецыялістам — шукаў людзей для ўладкавання на працу. Малады чалавек перыядычна ездзіў у Беларусь. Затрымалі яго некалькі месяцаў таму.

Цяпер Арэшка знаходзіцца ў СІЗА. Канкрэтнае абвінавачанне, выстаўленае яму, пакуль невядомае.