На чацвёртай лініі мінскага метро плануецца 17 станцый

"Мінскметрапраект" распрацоўвае чацвёртую лінію метро. У яе склад могуць увайсці 17 станцый, расказаў дырэктар праектнай установы Міхаіл Рудзько.

Цяпер у сталіцы дзейнічаюць тры лініі метрапалітэна. На першай — 15 станцый, на другой — 14, на трэцяй — пакуль 7, але іх колькасць будзе павялічвацца. Паводле словаў Рудзько, на сёння вядзецца будаўніцтва і заканчваецца праектаванне яшчэ трох станцый. Плануецца, што лінія будзе пасоўвацца ў Лагойскім кірунку.

"У перспектыве ўзвядзенне і чацвёртай лініі метрапалітэна. Мы ўжо разглядаем праект, распрацоўваем прапанову. Пакуль гэтая лінія налічвае 17 станцый, рыхтуем абгрунтаванне па кожнай. Магчыма, іх колькасць будзе карэктавацца ў большы ці меншы бок", — перадаюць "Мінск-Навіны" словы дырэктара "Мінскметрапраекта". Паводле яго, чацвёртая лінія метро будзе скіраваная ў бок "Паўночнага Берага".

Новыя перасадачныя станцыі плануецца будаваць глыбей, чым цяперашнія на дзейных галінках. Глыбіня гэтых станцый складзе прыкладна ад 20 да 25 м, астатнія будуць закладзеныя вышэй —— на 12-16 м пад зямлёй.

У "Мінскметрапраекце" кажуць, што чацвёртая лінія аб'яднае цяперашнія тры. У выніку пры перамяшчэнні па сталіцы пасажыры змогуць зэканоміць 10-15 хвілін. Таксама гэтая лінія ахопіць раёны, дзе цяпер метро няма, і злучыць з метрапалітэнам чыгуначныя прыпыначныя пункты, куды людзі прыязджаюць з гарадоў-спадарожнікаў. Пачаць яе будаўніцтва плануюць прыкладна ў 2030 годзе ці крыху раней.