Міліцыя перашкаджала жодзінцам збіраць подпісы супраць назапашвальніка адкідаў

Міліцыя перашкаджала жыхарам Жодзіна збіраць подпісы супраць назапашвальніка для камунальных адкідаў з Мінска, які пачалі будаваць у ваколіцах горада.

У актывістаў адбіралі падпісныя аркушы, а асобным зборшчыкам пагражалі нават арыштам.

"Гэта не спрыяе знікненню напружанасці, не стымулюе канструктыўнага дыялогу", — канстатуюць аўтары зварота, які сёння быў адпраўлены ў Адміністрацыю Лукашэнкі і ў Савет Рэспублікі. Да яго прыкладзена 169 аркушаў з некалькімі тысячамі подпісаў супраць будаўніцтва "сажалкі-назапашвальніка №19".

"Нашаму рэгіёну хапае мясцовых адкідаў. Не трэба вазіць нам сталічныя!" — дадаюць аўтары звароту.

Пра будаўніцтва назапашвальніка ў Смалявіцкім раёне грамадскасць даведалася постфактум: абвестак не было, грамадскія абмеркаванні, паводле мясцовых жыхароў, не праводзіліся. Людзі мяркуюць, што будаўніцтва пагражае экалагічнай бяспецы рэгіёна.