Машына заехала ў натоўп у Мюнхене, пацярпелі дзясяткі чалавек
У Мюнхене аўто заехала ў натоўп / dpa
Зранку 13 лютага ў Мюнхене ў натоўп людзей заехаў аўтамабіль Mini Cooper.
Інцыдэнт здарыўся перад міжнароднай канферэнцыяй па бяспецы, якая стартуе ў Мюнхене заўтра.
Паводле звестак паліцыі, якія перадае DW, каля 10:30 раніцы на плошчы Штыгльмаерплац, дзе адбыўся інцыдэнт, праходзіла дэманстрацыя прафсаюза Verdi. Гэты прафсаюз аб'ядноўвае службоўцаў горада. На акцыі яны патрабавалі павышэння заробку і дадатковых выходных
Паліцыянты паведамілі, што кіроўца затрыманы і больш не ўяўляе небяспекі.
BILD паведамляе, што ў выніку здарэння пацярпелі як мінімум 20 чалавек, у тым ліку дзеці. Два чалавекі знаходзяцца ў цяжкім стане.
Паліцыянты высвятляюць, быў гэта наўмысны наезд ці кіроўца пераблытаў педалі газу і тормазу.
Відавочцы сцвярджаюць, быццам паліцыянты, якія прыехалі на месца, адкрылі агонь па двух мужчынах. Мяркуецца, што адзін з іх атрымаў раненні.
