Сродкі ад транзіту беларускіх угнаенняў Літва можа выдзяляць Украіне
"Беларуськалій", ілюстрацыйнае фота / Getty Images
Калі Літва пад ціскам будзе вымушаная аднавіць транзіт беларускіх угнаенняў праз Клайпедскі порт, сродкі ад гэтага можна было б выкарыстаць для падтрымкі Украіны. Такую прапанову агучыў міністр абароны Літвы Робертас Каўнас.
"Клайпедскі порт з'яўляецца найбольш спрыяльным для экспарту, і тут мы вяртаемся да пытання пра 300 мільёнаў. Чаму б не накіраваць гэтыя 300 мільёнаў Украіне ў якасці дадатковых сродкаў? Такім чынам, мы як бы забіваем двух зайцоў адным стрэлам. Але пакуль гэта толькі інтэрпрэтацыя", — прыводзіць LRT словы міністра.
Транзіт калійных угнаенняў Літва прыпыніла з 1 лютага 2022 года, спасылаючыся на санкцыі ЗША супраць "Беларуськалія". На мінулым тыдні ЗША паабяцалі зняць санкцыі ў абмен на вызваленне больш за 100 палітвязняў з Беларусі.
Пры гэтым працягваюць дзейнічаць санкцыі ЕС супраць "Беларуськалія". Яны былі прынятыя 2 сакавіка 2022 года і штогод падаўжаюцца.
