"Лубянскія непаразуменні" — Канапацкая пра спробы пасварыць беларусаў і палякаў

Ганна Канапацкая нечакана вырашыла выказацца ў падтрымку беларуска-польскіх сувязяў. Пры гэтым раскрытыкавала інфармацыйныя рэсурсы, якімі кіруюць выхадцы з расійскай ФСБ.

"Палякі нам, беларусам, не ворагі. І мы ўсе пра гэта ведаем. Як бы ні спрабавалі скрывіць сутнасць гістарычных адносін двух народаў лубянскія непаразуменні, якія пасадзілі свае куцыя азадкі ў кіруючыя крэслы інфармацыйных рэсурсаў", — напісала Канапацкая на сваёй старонцы ў Фэйсбуку.

Амбасада Польшчы арганізавала ў Мінску фартэпіянны канцэрт "Музычнае падарожжа праз жыццё Шапэна" ў выкананні піяніста Гжэгажа Немчука. Вечарына была прымеркаваная да пачатку старшынства Польшчы ў Еўрасаюзе. На яе ў ліку іншых запрасілі і Канапацкую.

Дарэчы, апошнія некалькі гадоў ў беларускіх і расійскіх дзяржўных інфармацыйных рэсурсах разгарнулася актыўная антыпольская кампанія. У ёй удзельнічае і Лукашэнка, які неаднаразова казаў, быццам Польшча хоча адарваць частку Беларусі і далучыць да сябе.