Драма ў Варшаве: “Легія” Шкурына здолела выйсці ў групу Лігі канферэнцый

28 жніўня ў Варшаве “Легія” у супердраматычным матчы згуляла ўнічыю — 3:3 — з шатландскім “Хіберніянам” і прарвалася ў групавы этап Лігі канферэнцый. Першы матч скончыўся перамогай варшаўскага клуба з лікам 2:1.

Сустрэча ў адказ пачалася для “Легіі” складана. Шатландцы з першых секунд пачалі ціснуць, але ледзь не ў першай атацы варшаўскі клуб здолеў забіць гол. На перапынак каманды пайшлі пры ліку 1:0.

Пасля перапынку гульцы “Хіберніяна” выйшлі суперзаражанымі і літаральна за першыя 15 хвілін другога тайма забілі тры галы “Легіі”. Лік 1:3 выводзіў шатландцаў у групавы этап.

Трэнер “Легіі” заменамі паспрабаваў пераламаць ход гульні, выпусціўшы на поле на апошніх хвілінах у тым ліку і беларуса Іллю Шкурына.

Гаспадары пабеглі наперад, значна ўзмацнілі ціск і здолелі забіць гол, перавёўшы гульню ў дадатковы час — 2:3. Заметную ролю ў гэтым адыграў Шкурын, які мог і сам забіць, але не перайграў брамніка.

На пачатку дадатковага часу “Легія” працягнула актыўна атакаваць і зраўняла лік — 3:3. Такі вынік выводзіў каманду ў еўраосень.

“Хіберніян” перахапіў ініцыятыву і кінуўся забіваць. Гульня стала вельмі нервовай, з вялікай колькасцю сутычак. Шкурын пачаў дапускаць памылкі, адна з якіх ледзь не прывяла да гола ў вароты “Легіі”.

За сем хвілін да канца матчу суддзя выдаліў маладога абаронцу “Легіі” Яна Зялкоўскага, якога купляе італьянская “Рома” за 6 мільёнаў еўра. Шатландцы ўзнялі тэмп, забіваць пабег нават іх брамнік.

Але супервыратаванне галкіпера “Легіі” Каспера Тобіаса на апошніх секундах дазволіла камандзе ўтрымаць патрэбны лік і выйсці ў групавы этап Лігі канферэнцый.

Гістарычнае дасягненне польскага футбола

Польшча стала першай краінай у гісторыі, у якой чатыры клубы выйшлі ў асноўную стадыю Лігі канферэнцый. Акрамя варшаўскай “Легіі”, гэта “Лех”, “Ягелонія” і “Ракув”.

У клубным рэйтынгу УЕФА Польшча наблізілася да магчымасці выстаўляць два клубы ў Лізе чэмпіёнаў. Гэта можа адбыцца ўжо ў сезоне 2027/2028.