Лебядок пра тое, ці можна "саскочыць" з абавязацельстваў па інтэграцыі

Ваенны эксперт Ягор Лебядок чакае, што да Новага года мы яшчэ пачуем, як Лукашэнка пасварыцца з Пуціным. Вось толькі гэта будзе "іміджавая" сварка, якая ніяк не дапаможа "абнуліць" дамоўленасці па інтэграцыйным дэкрэце.
 

Гэта іншае

Тэкст інтэграцыйнага дэкрэта, які зацвярджае саюзныя праграмы, дагэтуль не апублікаваны. Гэта падштурхоўвае да думкі, што "не ўсё там прыгожа і можна спусціць на тармазы", лічыць ваенны эксперт Ягор Лебядок. Асаблівасць сітуацыі ў тым, што раней дэкрэтаў такога плана наогул не прымалася.

— Былі праграмкі на ўзроўні Саўміна, якія можна лёгка адфутболіць, спаслаўшыся на гэты орган і сказаўшы, што палітычная воля іншая — ідзем і аб'ядноўваемся. Гэта ж закон Саюзнай дзяржавы, які павінен дзейнічаць і для нашай дзяржавы, і для Расіі.

А можна "адкатаць" назад?

Ці можна сабатаваць дэкрэт і не прытрымлівацца прынятых рашэнняў? Лебядок лічыць, што цяпер у Лукашэнкі няма для гэтага рэсурсу.

Фармальна падпісалі не прэзідэнты, а прадстаўнікі Вышэйшага дзяржсавета Саюзнай дзяржавы.

— Праз год, два, тры ніякага значэння, хто гэта падпісваў, мець не будзе. Пачынае працаваць сістэма. І сутнасць інтэграцыйных мап Расіі ў пашырэнні эканамічнага ўплыву на Беларусь. Спыненне гэтай дамовы будзе прыводзіць да сур'ёзных эканамічных, а значыць, сацыяльных наступстваў, — тлумачыць Лебядок.

І што — прызнаюць Крым расійскім?

А што будзе са знешняй палітыкай Беларусі? Напярэдадні кіраўнік парламенцкай камісіі па міжнародных справах Андрэй Савіных заявіў, што "і дэ-факта, і дэ-юрэ Крым быў прызнаны беларускім бокам расійскім". У Крамлі ўжо пракаментавалі гэтую заяву. Там сказалі, што, як і ў Расіі, знешнюю палітыку вызначае не парламент, а прэзідэнт.

А што пра гэта думаюць ва Украіне? Ці адмовяцца ад эканамічных кантактаў з Беларуссю? Як Зяленскі будзе тлумачыць буйныя закупкі беларускага дызелю?

— Трэба разумець, што Украіна не аўтарытарная цэнтралізаваная дзяржава, дзе адзін сказаў, а астатнія пабеглі і зрабілі. Там ёсць свае алігархі, ёсць дробныя канторы, якія ўсё роўна будуць гэты бензін вазіць у кожным разе.

Але цяпер гэта становіцца асабістай праблемай Зяленскага: як мець зносіны з Лукашэнкам. Узаемаадносіны з Беларуссю працуюць супраць яго іміджу. Пакуль Лукашэнка цягнуў з фактычнай заявай аб прызнанні Крыма, украінцы на гэтыя заявы вяліся.

Дружба навек?

Лебядок не здзівіцца, калі яшчэ да Новага года мы ўбачым чарговыя выпады на адрас Расіі — для таго, каб падвысіць лаяльнасць аўдыторыі ўнутры Беларусі. А за мяжой — у той жа Украіне.

— Я думаю, праз месяц, паўмесяца зноў пачнуцца баданні Лукашэнкі з Пуціным, каб зымітаваць супрацьстаянне. І для сваіх прыхільнікаў, і для нейтральных, бо яшчэ да выбараў яго цішком пазіцыянавалі як абаронцу ад Расіі, не столькі Захаду. Цяпер яму трэба будзе гэты імідж адкатаць.

Новая Канстытуцыя праціснутая Расіяй?

Лукашэнка не зацікаўлены ў зменах у Канстытуцыю, лічыць Лебядок.

— Для мяне відавочна, што новая Канстытуцыя — гэта ціск Расійскай Федэрацыі. Пачалося ўсё ў 2018 годзе. У часе звароту Лукашэнкі да парламента ўсе чакалі заявы па новай Канстытуцыі. Але адбылася рэвалюцыя ў Арменіі, і Лукашэнка заявіў, што ў гэтых цяжкіх умовах мы не можам мяняць Канстытуцыю.

Умовы цяпер на парадак горшыя, чым у красавіку 2018-га, тым не менш нейкую Канстытуцыю робім.

Лебядок адзначае, што любая палітычная кампанія цяпер Лукашэнку не на руку. Эксперт перакананы, што і рэферэндум у лютым не пройдзе, а будзе адкладзены.