Вальфовіч прызнаў: грамадзянскія прадпрыемствы перавялі на вытворчасць снарадаў
Наступствы траплення снарада ў жылы дом ва Украіне
Беларускія грамадзянскія прадпрыемствы вырабляюць снарады на экспарт, вынікае са словаў старшыні Савета бяспекі Аляксандра Вальфовіча.
"Мы асвоілі вытворчасць боепрыпасаў да артылерысцкіх сістэм, да рэактыўных сістэм залпавага агню, перафарматаваўшы некаторыя грамадзянскія прадпрыемствы, і сапраўды выйшлі на сучасныя тэхналогіі вытворчасці боепрыпасаў для сваіх Узброеных сілаў. У тым ліку гэта экспартны тавар, які, на жаль, карыстаецца попытам", — сказаў Вальфовіч, наведваючы аршанскі "Легмаш".
Год таму Еўрарадыё пісала са спасылкай на ўласныя крыніцы, што ў 2022 годзе ў некалькіх беларускіх заводаў пачалося "новае жыццё". Прадпрыемствы, якія спецыялізаваліся на вытворчасці металічных дэталяў і інструментаў, тэрмінова правялі рамонты, закупілі новыя станкі і актыўна шукаюць новых работнікаў. Прычым заробкі, якія прапаноўвалі патэнцыйным супрацоўнікам, значна вышэйшыя, чым сярэднія па Віцебскай вобласці.
Сярод такіх прадпрыемстваў быў і "Легмаш". Паводле інфармацыі крыніцы Еўрарадыё, прадпрыемства пасля пачатку поўнамаштабнага ўварвання Расіі ва Украіну пачало працаваць на расійскую абаронку. Яно вырабляла карпусы снарадаў для расійскай арміі. А пачыналася гісторыя "Легмаша" вельмі мірна: у 1945 годзе яго стварылі як завод для вытворчасці ацяпляльных катлоў, а потым пачалі вырабляць там бытавыя швейныя машынкі.
