Латушка : Лукашэнка паказваў Кіту Кэлагу матэрыялы, якія “знішчаць” дэмсілы”

Дадатковымі фактарамі гібрыднай агрэсіі з боку рэжыма кіраўнік НАУ называе штучна створаны міграцыйны крызіс на польска-беларускай мяжы, пагрозы і запалохванне прадстаўнікоў дэмакратычнага руху за мяжой (напады, выкраданні, заводныя прысуды, пераследы сем’яў у Беларусі і г.д.).

Таксама рэжым выкарыстоўвае вярбоўку грамадзян, якія не ўваходзяць у палітычныя структуры ці грамадзянскія ініцыятывы.

— Узмацненне пагрозаў і інтэнсіўных дзеянняў з боку рэжыму выклікае ў нас сур’ёзнае занепакоенасць. Прайшло ўжо больш за чатыры месяцы з моманту знікнення былой спікеркі Каардынацыйнай Рады Анжалікі Мельнікавай. Аднак да гэтага часу не з’явілася ніякай інфармацыі пра месца яе знаходжання, што выклікае ў нас падазрэнні, што можа яна ўжо і не жывая, — кажа Латушка.

“Будзе не бомба, а бамбішча”

Павел Латушка звяртае ўвагу на актывізацыю правакацый супраць прадстаўнікоў дэмсіл за мяжой. Ён узгадвае нападзенне на яго падчас сустрэчы ў Варшаўскім універсітэце. Спробу невядомых пад выглядам журналістаў расійскай “Новай газеты” ўзяць інтэрв’ю ў самаго Латушкі і ў Святланы Ціханоўскай. І пагрозу забойствам ім з боку былога супрацоўніка МУС Беларусі, які цяпер знаходзіцца ў Польшчы.

Латушка заклікаў усіх зразумець, што “мы жывём у перадваенны час і супраць нас працуе выведка”. Таму, паводле яго словаў, у апошні час прадстаўнікі дэмсілаў атрымліваюць шматлікія пагрозы. Павел Латушка кажа, што яны паступаюць "як знутры сістэмы, так і ад “калектыўнага КДБ”, які пастаянна дасылае яму лісты на электронную пошту, а таксама ад людзей, якія прыязджаюць сюды [у Польшчу]”.

— Паводле нашых звестак, з дакладных крыніц у Беларусі, а таксама з прамой карэспандэнцыі ад “калектыўнага КДБ” Беларусі на мой адрас, у дачыненні да мяне, чальцоў і чалінь каманды НАУ, а таксама прадстаўнікоў іншых дэмакратычных сіл Беларусі рыхтуецца правакацыя. Ужываюцца словы, і гэта цытата: “Пачынаецца ваша знішчэнне, будзе не бомба, а бамбішча, — кажа кіраўнік НАУ.