Кітайскі адказ Трампу абваліў сусветныя цэны на нафту

Кітай адказаў на гандлёвую вайну, пачатую Дональдам Трампам. У Пекіне заявілі, што з 10 красавіка ўводзяць мыты ў памеры 34% на амерыканскія тавары.

У адзін момант абваліліся цэны на нафту Brent. Яны апусціліся ніжэй за 65 долараў — такога не было з 2021-га.

Як паведамлялася раней, 2 красавіка Трамп падпісаў указ на ўвядзенне мытаў на пастаўкі тавараў з 184 краін. У гэты спіс не патрапілі Беларусь і Расія. Для краін, не ўключаных ва ўказ, дзейнічае базавая пошліна ў 10%.

Рашэнне Трампа адмоўна паўплывала на фондавы рынак ЗША: за першыя ж суткі пасля яго абвяшчэння капіталізацыя амерыканскіх акцый знізілася на 2,5 трлн долараў.