Гандлёвая вайна Трампа ўдарыла па амерыканскім фондавым рынку

Гандлёвая вайна ЗША з усім светам ударыла па саміх Штатах. Трэцяга красавіка стала найгоршым днём для амерыканскай фондавай біржы з 2020 года.

2 красавіка Дональд Трамп абвясціў павальныя тарыфы на імпарт тавараў у ЗША. У спіс трапілі 184 краіны.

Індэкс Nasdaq на наступны дзень пасля гэтага панізіўся на 6%, S&P 500 — на 4,8%, а Dow Jones — на 3,9%.

Паводле інфармацыі Bloomberg, капіталізацыя амерыканскіх акцый знізілася на 2,5 трлн долараў. Для прыкладу: дзве найбуйнейшыя кампаніі ў ЗША, Apple і Nvidia, страцілі агулам 520 млрд долараў.

Таксама зніжэнне індэксаў было зафіксаванае на еўрапейскіх і азіяцкіх пляцоўках. Індэкс EURO STOXX апусціўся на 3,59%, японскі Nikkei — на 3,19%.