Кіраўнік “Беларуськалія” пацвердзіў гібель дваіх шахцёраў

Двое шахцёраў “Беларуськалія”, што трапілі пад завалы, загінулі. Гэту інфармацыю пацвердзіў тэлеканалу АНТ генеральны дырэктар прадпрыемства Іван Галаваты.

“На жаль, цуду не здарылася — хлопцы загінулі”, — сказаў ён.

Інцыдэнт здарыўся ўвечары 9 сакавіка, калі адбывалася засечка на тэхналагічную збойку 22-б заходняга слупа гарызонту -620м. Парода раптоўна абрынулася і пры гэтым адбыўся выкід солі і газу. Інтэнсіўнасць выкіду склала каля 600 м³ горнай масы. Праходніцкі камбайн і самаходны вагон, у якіх было двое работнікаў, апынуліся цалкам засыпанымі выкінутай пародай.

Гэта машыніст горных вымальных машын Іваноў Максім Анатольевіч, 1973 года нараджэння і горнарабочы ачышчальнага забою Валькоў Дзмітрый Анатольевіч, 1985 года нараджэння. Іх целы знайшлі ў ноч на нядзелю.

Як паведамлялася раней, гэта была эксперыментальная ходка шахцёраў з мэтай паляпшэння вытворчасці. Раней у тым самым месцы ўжо здараліся абвалы пароды, таму дзеля бяспекі прыдумалі спецыяльныя ўмацаванні.

Інцыдэнтам па шахце “Беларуськалія” заняўся Следчы камітэт — распачатая крымінальная справа па факце парушэння правілаў бяспекі горных працаў (арт. 303 КК РБ).