Канцэрт Макса Каржа ў Алматы канчаткова адмянілі
Канцэрт Макса Каржа адмянілі / абвестка з старонкі Макса каржа ў Фэйсбуку
У казахстанскім Алматы канчаткова адмянілі канцэрт беларускага рэпера Макса Каржа, прызначаны на 6 верасня. Пра гэта паведамілі арганізатары мерапрыемства і каманда артыста.
У Instagram-акаўнце Макса Каржа 3 верасня з'явіўся такі каментар да адмены: "Вельмі шкада. Мы рабілі ўсё магчымае".
Арганізатары мерапрыемства адзначылі, што вялі падрыхтоўку з лістапада 2024 года, "уклалі каласальныя сродкі і сілы" ў падрыхтоўку канцэрта. Яны паведамілі, што 35 тысяч квіткоў, якія паступілі ў продаж 17 сакавіка, былі раскупленыя ў вельмі кароткі тэрмін. Чакалася, што з-за мяжы Казахстана на выступ рэп-выканаўцы прыедуць больш за 17 000 гледачоў.
Аднак пад канец жніўня дырэкцыя спартовых збудаванняў Алматы паведаміла пра адмену, звязаную з тэхнічным станам поля. "Пасля нам паведамілі, што выдадзены дазвол не з'яўляецца актуальным на бягучы момант, на жаль, новы дазвол мы так і не атрымалі", — канстатуюць арганізатары.
Яны абяцаюць вярнуць усе набытыя квіткі па месцы іх набыцця.
Як паведамлялася раней, пасля жнівеньскага канцэрта Макса Каржа ў Варшаве было затрымана больш за 100 чалавек. Шасцярых беларусаў і 57 украінцаў пастанавілі дэпартаваць з Польшчы.
