Калі вы чакаеце пацяплення, дык дарма: на наступным тыдні можа быць -15
Зіма застаецца / Depositphotos
Уся Усходняя Еўропа, і Беларусь не выключэнне, знаходзіцца пад уплывам антыцыклону Эльвіра. Менавіта дзякуючы яму прыйшло такое пахаладанне і сапраўдная зіма. І адлігі ў бліжэйшы час чакаць не варта.
Да 13 лютага надвор'е ў Беларусі будзе залежаць толькі ад Эльвіры, а гэта значыць, што ападкаў амаль не будзе, але будзе холадна. Прычым у ноч на сераду месцамі тэмпература паветра можа апусціцца да -15°C.
У сярэднім, згодна з графікамі надвор'я, удзень у бліжэйшыя дні будзе -1…-5°C, а ўначы -5…-8°C.
Але гэта не азначае, што пасля гэтага пацяплее. Доўгатэрміновыя прагнозы пацвярджаюць, што люты ў Беларусі будзе зімовым.
Больш за тое, паводле некаторых мадэляў, у канцы лютага цэнтральныя і паўднёва-ўсходнія часткі Беларусі апынуцца ў зоне вельмі нізкіх тэмператур, і па начах месцамі можа быць -20°C і нават халадней. Уся надзея на тое, што доўгатэрміновыя прагнозы нярэдка памыляюцца.
