МАК дазволіў праводзіць у Беларусі міжнародныя спаборніцтвы
Алімпійскі дом у швейцарскай Лазане / AFP
Міжнародны Алімпійскі камітэт зняў забарону на правядзенне міжнародных спаборніцтваў у Беларусі. Але ці адбудуцца яны, будзе вырашаць кожная федэрацыя самастойна. Сваё рашэнне ў МАК аргументавалі тым, што спартоўцы не адказваюць за кіраўніцтва краіны.
Забарону на выкарыстанне дзяржаўнага сцяга, герба і гімна працягнулі.
Юным спартоўцам з Беларусі і Расіі дазволілі ўдзельнічаць у міжнародных юнацкіх спаборніцтвах як у індывідуальных, так і ў камандных відах спорту. У тым ліку было дазволена ўдзельнічаць у юнацкіх Алімпійскіх гульнях "Дакар-2026".
Дарослыя атлеты такога дазволу не атрымалі.
МАК пакінуў у сіле санкцыі супраць дзяржаўных службоўцаў, звязаных са спортам. Іх па-ранейшаму нельга запрашаць ці даваць ім акрэдытацыю на міжнародныя спаборніцтвы і сустрэчы — ні дарослыя, ні юнацкія.
