Гайд па бяспецы: як паводзіць сябе падчас атакі беспілотнікаў

06/09/2024 - 18:10

Беспілотнік “Шахед-136” / mil.in.ua

У ліпені гэтага года расійскія беспілотнікі пачалі залятаць на тэрыторыю Беларусі. А 29 жніўня беларуская авіяцыя збіла першы “Шахед” у Ельскім раёне Гомельскай вобласці.

Паколькі мясцовыя ўлады не здолелі папярэдзіць гамельчукоў, а прапагандыст Рыгор Азаронак нават параіў "засунуць у дупу свой тэлефон" і "не пісаць каментары наконт таго, чаго не ведаеш", мы вырашылі скласці для вас дапаможнік пра тое, што рабіць падчас атакі дронаў.

Украінскі Цэнтр стратэгічных камунікацый інфармуе, што падчас набліжэння беспілотнікаў-камікадзэ “Шахед-136” у паветры выразна чуваць гук, падобны на працу рухавіка мапеда або бензапілы.

Як сябе паводзіць:

1. Калі дзесьці паблізу пачуеце гук — ацаніце абстаноўку навокал і трымайцеся далей ад адміністрацыйных будынкаў, стратэгічных і вайсковых аб'ектаў. У выпадку Украіны менавіта яны часцей за ўсё становяцца мішэнямі праціўніка.

2. Калі побач з вамі ёсць сховішча, спусціцеся і перачакайце атаку там. Гэта можа быць як бамбасховішча, так і падвал, падземны пераход, метро, канава ці траншэя, вялікія падвалы пад капітальнымі будынкамі старой забудовы.

3. Калі абстрэл заспеў вас знянацку, ляжце на зямлю і накрыйце галаву рукамі ці торбай. Для большай абароны паспрабуйце схавацца ў паглыбленні, яме або за сцяной ці бардзюрам.

4. Калі сховішча далёка, прытрымлівайцеся правіла “дзвюх сцен”, якія мусяць аддзяляць вас ад небяспекі. Таксама трымайцеся далей ад вокнаў і шкляных паверхняў.

5. Не заставайцеся ў транспартным сродку падчас абстрэлу.

6. Знайшоўшы памяшканне ці дом, абярыце месца ў куце і недалёка ад выхаду, каб у выпадку трапляння снарада неадкладна пакінуць дом. Заставайцеся ў сховішчы не менш за 10 хвілін пасля заканчэння абстрэлу.

7. Не хавайцеся у пад'ездах, пад аркамі, на лесвічных клетках, у падвалах панельных дамоў, каля аўтамабільнай тэхнікі, аўтазаправачных станцый.

Галоўнае — не панікуйце і заставайцеся цвярозымі. Пасля атакі не набліжайцеся да месца падзення збітага беспілотніка і не дакранайцеся да абломкаў.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.