Двое грамадзян Літвы абвінавачваюцца ў шпіянажы на карысць Беларусі

Двое грамадзян Літвы абвінавачваюцца ў шпіянажы на карысць Беларусі. Літоўская Генпракуратура перадала іх справу ў суд, піша lrt.lt.

Усё пачалося з таго, што ў канцы 2022 года абодва абвінавачаныя паехалі ў Беларусь. Праз пасярэдніка яны дамовіліся аб кантактах і далейшым супрацоўніцтве з прадстаўнікамі вайсковых структур РБ. "У мэтах шпіянажу" адзін з мужчын уступіў у Літоўскі саюз стралкоў і стаў яго актыўным членам.

Мяркуецца, што да свайго затрымання ў лістападзе 2023 года абодва абвінавачаныя за грошы выконвалі заданні Галоўнага разведвальнага ўпраўлення Генштаба Мінабароны Беларусі. Апошняе цікавіла інфармацыя аб дыслакаванай у Літве вайсковай тэхніцы і ўзбраеннях, якія належаць як літоўскім падраздзяленням, так і саюзнікам па NATO, аб стратэгічнай інфраструктуры аб'ектаў і іх ахове. Таксама збіраліся даныя пра працу Літоўскага саюза стралкоў і змест яго вучэнняў, пра дзейнасць беларускай апазіцыі ў Літве і яе ўдзельніках. У Беларусі былі зацікаўлены і ў звестках пра грамадзян Літвы-патэнцыйных кандыдатах на вярбоўку.

Мяркуецца, што сабраная і перададзеная ў Мінск інфармацыя не была засакрэчанай. Аднак яна "ўяўляе каштоўнасць для ўзброеных сіл замежных дзяржаў пры падрыхтоўцы планаў ваеннай агрэсіі, а таксама выкарыстоўваецца для іншай дзейнасці, накіраванай супраць Літвы". Відаць, разглядаецца варыянт, што РБ магла перадаваць атрыманую інфармацыю Расіі.

Грамадзянам Літвы пагражае да 15 гадоў пазбаўлення волі.

Адзначаецца, што літоўскія спецслужбы атрымалі каштоўную інфармацыю пра метады і сродкі спецслужбаў РБ.