Дачка гродзенскага сілавіка пасля артыкулаў у СМІ закрыла блог з турмы Непала

Гродзенка Аліна Алдошына закрыла блог, які вяла з непальскай турмы. У сацсетках яна расказвала пра свой турэмны побыт.

Дзяўчыну асудзілі ў Непале  за спробу перавезці 6 кг какаіну. Яе публікацыі пра турэмны побыт звярнулі на сябе ўвагу беларускіх СМІ. Пасля гэтага Алдошына выдаліла іх з сацсетак.

Пра ўмовы ўтрымання ў непальскай турме Аліна расказвала спачатку ў Threads, а потым — у Telegram-канале "Узница Непала", піша hrodna.life. Тыдзень таму яна напісала ў Threads, што пакуль не будзе весці канал. У каментарах дзяўчына дадала, што будзе на сувязі, але "без турэмнага кантэнту".

"Я не хачу, каб згадка пра маю сям’ю была ў СМІ ў РБ", — патлумачыла яна.

Telegram-канал "Узница Непала" праіснаваў у адкрытым доступе суткі, пасля чаго гродзенка схавала кантэнт. Яе Instagram-акаўнт актыўны, але схаваны ад непадпісаных карыстальнікаў.

Аліну Алдошыну арыштавалі ў аэрапорце Катманду з 6 кг какаіну ў зімовай куртцы ў 2019 годзе. Яе бацька Аляксей Алдошын на той час быў першым намеснікам начальніка міліцыі Ленінскага раёна Гродна. Разам з дзяўчынай затрымалі яе сябра Паўла Васільева. Маладыя людзі казалі, што пагадзіліся на перавозку куртак, бо хацелі зарабіць грошы, а пра наяўнасць какаіну не здагадваліся. За кантрабанду наркотыкаў ім прысудзілі па 15 гадоў зняволення.