Беларуса ў Польшчы асудзілі за перавозку мігрантаў больш за 20 гадоў таму

Шэсць гадоў зняволення прысудзіў апеляцыйны суд Беластока былому беларускаму памежніку, які ў 2000-2007 гадах дапамагаў мігрантам нелегальна перасякаць мяжу. Мужчына быў у вышуку больш за дзесяць гадоў. Яго арыштавалі, калі ён прыехаў у Польшчу на працу, піша MOST.

Паведамляецца, што беларус дзейнічаў у складзе групоўкі, якая дапамагала грамадзянам Кітая і В'етнама нелегальна трапляць у краіны Заходняй Еўропы. У Беларусі ў яе ўваходзілі і іншыя памежнікі. Мужчына служыў на мяжы з Польшчай — з боку і Падляскага, і Люблінскага ваяводстваў.

Суд выявіў, што памежнік дапамагаў мігрантам дабрацца да пэўнага месца на мяжы. Там у прызначаны час іх забіралі польскія ўдзельнікі групоўкі і везлі ў наваколле Варшавы. Адтуль мігрантаў ужо іншыя перавозчыкі дастаўлялі ў краіны Заходняй Еўропы. Такім спосабам маглі пераправіць сотні замежнікаў. Следства мяркуе, што гэтая нелегальная дзейнасць каардынавалася з Масквы.

Асобу беларуса, які ўдзельнічаў у гэтай схеме, польскія следчы выявілі даўно і абвясцілі яго ў вышук. але затрымаць яго змаглі толькі ў 2022 годзе.

Акруговы суд Беластока разглядаў справу яшчэ ў ліпені 2024 года. Беларусу прысудзілі шэсць з паловай гадоў пазбаўлення волі і штраф — 72 тысячы злотых. Прысуд абскардзілі і абарона, і пракуратура. Абарона хацела апраўдання для экс-памежніка, а пракуратура — павялічыць прысуд да дзевяці гадоў.

Апеляцыйны суд падтрымаў вердыкт суда першай інстанцыі па ўсіх эпізодах, акрамя аднаго, па якім скончыўся тэрмін даўнасці. У выніку прысуд быў зменшаны да шасці гадоў.