Да барацьбы з "дармаедамі" ў Жлобіне падключылі ваенкамат
Сход у ваенкамаце ў Жлобіне / "Новы дзень"
У Жлобіне да барацьбы з так званымі "дармаедамі" далучыліся не толькі міліцыя, але і ваенкамат.
23 ліпеня ў ваенкамаце прайшло "прафілактычнае мерапрыемства", на якое сабралі ваеннаабавязаных, якія дэмабілізаваліся пасля тэрміновай службы, заўважыў "Флагшток". У ваенкамат выклікалі больш за 100 хлопцаў, якія адслужылі ў войску.
Каб "дапамагчы з выбарам прафесіі", ваенкам запрасіў на сустрэчу прадстаўнікоў сілавога блока раёна (супрацоўнікаў міліцыі, работнікаў раённага аддзела па надзвычайных сітуацыях), а таксама прадпрыемстваў раёна.
Пры гэтым большая частка з тых, хто адслужыў у войску, ужо ўладкавалася на працу. Аднак іх усё адно сабралі ў ваенкамат — каб прадстаўнікі суда і пракуратуры расказалі пра "найбольш часта сустраканыя правапарушэнні і злачынствы і адказнасць вінаватых асоб".
