Ці варта шукаць у Беларусі рэдказямельныя металы? Адказвае навуковец

Рэдказямельныя элементы ў Беларусі былі знойдзеныя прыкладна ў 50-х гадах XX стагоддзя. Але геалагічная служба СССР, якая была вельмі дасведчанай і, бадай, адной з лепшых у свеце, сказала, што гэтыя запасы мізэрныя і не ўяўляюць агулам ніякай камерцыйнай цікавасці.

Магчыма, чыноўнікі ў Беларусі пра гэта забыліся, ці, не ведаю, чым яны там кіруюцца, калі зноў уздымаецца гэтае пытанне.

Я ўжо неаднаразова казаў: замест таго, каб капаць на кіламетры і нешта шукаць, звярнулі б увагу на адкіды Гомельскага хімічнага камбіната — вось гэтыя гомельскія горы. У іх вельмі шмат рэдказямельных элементаў. Гэтыя адкіды ляжаць і забруджваюць экалогію, але чамусьці іх ніхто не бачыць.

Гэтая сітуацыя паказвае, які сапраўдны ўзровень экспертызы тых людзей, якія нібыта цікавяцца гэтай тэмай. І гэта кажа таксама пра тое, што ў атачэнні Лукашэнкі няма спецыялістаў, якія б маглі аб’ектыўна ацаніць неабходнасць у гэтых рэдказямельных элементах. І, канешне, яны нічога не змогуць зрабіць з іх выдзяленнем. Гэта проста смешна. Такіх кампетэнцый там няма.

Мы назіраем звычайны папулізм.

Я думаю, Лукашэнка загаварыў пра гэта, каб атрымаць увагу і пасмяшыць людзей. Акрамя смеху і нейкай іроніі, ягоны загад нічога не выклікае. Проста стэндап.