Чыноўніца сказала, чаму не дазваляюць рэкламаваць сыр і каўбасу на вагонах метро

Камерцыйная рэклама не з'явіцца ні на вагонах метро, ні на бартах грамадскага транспарту. Пра гэта заявіла першая намесніца старшыні Мінгарвыканкама Надзея Лазарэвіч.

На яе думку, рэкламаваць гэтыя прадукты можна ў іншых месцах. А метро, паводле чыноўніцы, аб'ект вялікага сацыяльнага значэння, таму рэкламаваць там каўбасу, сыр і шампуні "не зусім карэктна".

"У нас нямала іншых месцаў, дзе можна прасоўваць прадукцыю: у горадзе 80 білбордаў, з электроннымі табло і ў самых топавых лакацыях", — падкрэсліла Лазарэвіч.

Яна параіла вытворцам звяртацца ў "Мінскрэкламу", дзе беларускай прадукцыі абяцаюць лаяльныя ўмовы. Акрамя таго чыноўніца рэкамендавала даваць рэкламу на тэлебачанне і ў СМІ, а таксама — удзельнічаць у кірмашах і выставах.

Лазарэвіч дадала, што наземны транспарт таксама непрыдатнае месца для камерцыйнай рэкламы, хаця ёсць нямала ахвочых.