Больш за 200 вагонаў з ваеннымі грузамі даставілі за 2024 год з РФ у РБ
Перавозка вайсковай тэхнікі па чыгунцы, ілюстрацыйнае фота / @modmilby
За 2024 год з Расіі ў Беларусь чыгункай даставілі як мінімум 216 вагонаў з грузамі ваеннага прызначэння.
Як паведамляе "Супольнасць чыгуначнікаў Беларусі", адпраўнікамі былі 19 прадпрыемстваў ВПК РФ і структур Узброеных сіл РФ. Тэхніка, боепрыпасы і камплектуючыя ў Беларусь накіроўваліся з расійскіх чыгуначных станцый Усад, Стройка, Праўдзінск, Важой, Пенза IV, Красны Бор, Вагоназавод, Чабаксары, Ейск, Котава, Марцава, Марозаўская, Патрыкеева і г.д.
Напрыклад, на адрас 1052-га асобнага радыётэхнічнага батальёна ў Мазыры былі дастаўленыя чатыры вагоны з радыёлакацыйнымі комплексамі. А 25-ы арсенал ракетна-артылерыйскага ўзбраення атрымаў 10 вагонаў з зенітна-ракетнымі комплексамі "Тор-М2".
Агулам грузы былі дастаўленыя на адрас дзесяці беларускіх вайсковых часцей. Найбольшая колькасць вагонаў летась прыйшла на станцыю Прудок Віцебскагае аддзялення чыгункі — 60 адзінак. Яны былі адпраўленыя на адрас 2631-й авіяцыйнай базы захоўвання ракетнага ўзбраення і боепрыпасаў Мінабароны Беларусі (в/ч 94017). Як кажуць у супольнасці чыгуначнікаў, пераважна гэта былі авіяцыйныя сродкі паражэння.
