Беларусаў амаль перастала хваляваць вайна, затое больш — уласны дабрабыт
Свежыя даныя Цэнтра новых ідэй / belarusfacts.by
Беларусы сталі менш баяцца вайны ў рэгіёне, але мацней турбавацца пра ўласную кішэню і дабрабыт. Такія даныя прыводзіць Цэнтр новых ідэй у даследаванні “Вобраз беларускага рэжыму: агрэсар ці апякун”.
Лічбы паказваюць, што ў 2025 годзе пагроза ўдзелу Беларусі ў вайне застаецца актуальнай толькі для 28% апытаных. У красавіку 2022 года ўзровень хвалявання з гэтай нагоды быў у два разы вышэйшы.
З пачаткам поўнамаштабна вайны Расіі супраць Украіны ў 2022 годзе беларускі рэжым на міжнароднай арэне ўсё часцей называлі суагрэсарам, але ўнутры краіны замацаваўся вобраз міратворцы. За апошні час запыт на бяспеку пачаў зніжацца, а запыт на эканамічную справядлівасць і палітычную лібералізацыю — расці.
Пры гэтым беларусы лічаць, што ўлада хутчэй спраўляецца са сваімі абавязкамі.
Беларусы ўпэўнены, што ўлада ў першую чаргу абараняе свае інтарэсы. Гэта можа сведчыць пра крызіс легітымнасці.
Пры гэтым большасць не здолела адказаць на пытанне, якія поспехі былі ў Беларусі за апошнія 5 гадоў.
Такія паводзіны патэнцыйна ўказваюць на калектыўную стратэгію замоўчвання. Яна ўласцівая супольнасцям, якія не маюць магчымасці для асэнсавання траўматычнага досведу.
