Беларусь збіраецца павялічыць закупкі газу ў Расіі
Залежнасць Беларусі ад расійскага газу не зніжаецца / ria.ru
Беларусь збіраецца павялічыць закупкі газу ў Расіі, нягледзячы на тое, што працуе Астравецкая АЭС і скарачаецца яго выкарыстанне ў энергетыцы. Пра гэта паведаміў намеснік міністра энергетыкі Дзяніс Мароз.
"Мы менш яго выкарыстоўваем на гэты момант на патрэбы выпрацоўкі электрычнай энергіі, і ацяплення, і гарачага водазабеспячэння. Але гэта важны рэсурс", — кажа чыноўнік.
Летась РБ купіла ў РФ 17,2 млрд кубаметраў газу. "Такія ж аб'ёмы будуць захаваны і нават будуць нарошчвацца, улічваючы тое, што з'яўляюцца новыя вытворчасці, якія выкарыстоўваюць гэты важны сыравіннай рэсурс Расійскай Федэрацыі", — працягвае сваё тлумачэнне Мароз. Якія вытворчасці, ён не ўдакладніў.
Раней і Аляксандр Лукашэнка, і яго чыноўнікі гаварылі, што дзякуючы АЭС зменшыцца залежнасць Беларусі ад расійскага газу. Але, як бачым, нешта пайшло не так. А яшчэ летам 2023-га Мінэнерга паведамляла, што аб'ём спажывання прыроднага газу ў Беларусі скарачаецца.
