Беларусь страціла 4-е месца ў футбольных еўракубках

Беларусь страціла 4-е месца ў футбольных еўракубках. Нялепшыя выступы беларускіх клубаў у апошнія гады прывялі да паніжэння рэйтынгу краіны. У гэтым сезоне мінскае "Дынама", "Тарпеда-БелАЗ", "Нёман" і "Іслач" сумарна зарабілі 1,875 бала. Агульны рэйтынг за апошнія пяць гадоў у Беларусі — 6,000. І гэтага недастаткова, каб трапіць у топ-50. Наша краіна ў еўракубкавым рэйтынгу займае толькі 52-е месца.

У сезоне-2026/27 Беларусь страціць адну еўракубкавую пуцёўку, яе прадставяць толькі тры клубы, піша "Трыбуна".

Напярэдадні мінскае "Дынама" правяло апошні матч у Лізе канферэнцый (самы позні ў гісторыі беларускага футбола — пачаўся а 23-й гадзіне). У Афінах быў разгром ад "Панацінаікаса" — 0:4. У асноўным раўндзе дынамаўцы прайгралі пяць гульняў з шасці. Агулам каманда правяла ў еўракубках 14 матчаў: 4 — у адборы Лігі чэмпіёнаў, 4 — Лігі Еўропы, 6 — у асноўным раўндзе Лігі канферэнцый. Вынік: 4 перамогі, 1 нічыя, 9 паражэнняў. Клуб зарабіў амаль 5 млн еўра.