Англіканскую царкву ўпершыню ў гісторыі ўзначаліла жанчына

63-гадовая Сара Мулалі заняла пасад арцыбіскупа Кентэрберыйскага. Такім чынам, англіканскую царкву ўпершыню ў гісторыі ўзначаліла жанчына. Яна лічыць сябе феміністкай і выступае за правы ЛГБТ.

У 2017 годзе Мулалі стала першай жанчынай-біскупам Лондана. Сваю святарскую кар'еру яна пачала ў 2001-м, а да таго была медсястрой.

Пасля пасвячэння, як паведамляе Бі-Бі-Сі, Мулалі займала пасады ў брытанскім Міністэрстве аховы здароўя і ўваходзіла ў апякунскую раду ўніверсітэта King's College London.

У Англіканскай царкве ўпершыню дазволілі высвячацца жанчынам у святары ў 1994 годзе. Першыя прызначэнні жанчын-біскупаў адбыліся яшчэ праз 20 гадоў, у 2014-м.

Папярэдні арцыбіскуп Кентэрберыйскі Джасцін Уэлбі сышоў у адстаўку год таму. Гэта адбылося пасля скандалу ў сувязі са справай юрыста Джона Смайта. Яго абвінавацілі ва ўжыванні цялесных пакаранняў да хлопчыкаў у хрысціянскіх лагерах у 1970-1980 гады. Англіканскую царкву абвінавацілі ў бяздзейнасці ў гэтым выпадку.