Аховай Ціханоўскай будзе займацца літоўская паліцыя
Святлана Ціханоўская / Еўрарадыё
Ахову Святланы Ціханоўскай бярэ на сябе літоўская паліцыя. Гэта адбудзецца бліжэйшымі днямі.
"Магу пацвердзіць, што паліцыя бярэ на сябе ахову Ціханоўскай", — паведаміў інфармагенцтву BNS прэс-сакратар Дэпартамента паліцыі Рамунас Матоніс.
Таксама ён дадаў, што інфармацыя аб рэжыме аховы Ціханоўскай апублікаваная не будзе.
Святлана Ціханоўская і яе Офіс былі пад аховай Службы бяспекі кіраўніцтва дзяржавы. Увосень стала вядома, што ўзровень аховы плануецца панізіць. Літоўскі бок тлумачыў гэты намер змяншэннем пагроз для Ціханоўскай і тэхнічнымі прычынамі.
На фоне гэтага пачаліся размовы пра магчымы пераезд Офіса Ціханоўскай з Вільні ў Варшаву. Аднак дарадцы Ціханоўскай яшчэ тыдзень таму заяўлялі, што гэта непацверджаныя чуткі, Офіс працуе ў звычайным рэжыме.
