Ад Купалаўскага тэатра патрабуюць спектаклі "патрыятычнай тэматыкі"

Ад Купалаўскага тэатра патрабуюць ставіць больш спектакляў патрыятычнай тэматыкі. Гаворка пра гэта ішла на сходзе калектыву тэатра з нагоды пачатку новага тэатральнага сезона, паведамляе прэс-служба Мінкультуры.

У сходзе прыняла ўдзел скандальна вядомая Ірына Дрыга. Цяпер гэтая чыноўніца ўзначальвае Галоўнае ўпраўленне дзяржаўных спецыяльных культурных мерапрыемстваў і прафесійнага мастацтва. Яна ў сваім выступе звярнула ўвагу, што тэатр павінен больш зарабляць і пашырыць геаграфію сваіх гастроляў. Таксама, як паведамляецца, чыноўніца заявіла пра "неабходнасць узбагачэння рэпертуару спектаклямі патрыятычнай тэматыкі".

У 2020-м большасць супрацоўнікаў Купалаўскага тэатра падтрымалі патрабаванне палітычных перамен у краіне. Пасля звальнення дырэктара тэатра Паўла Латушкі амаль увесь калектыў пакінуў тэатр, многія былі вымушаныя эміграваць. Купалаўскі тэатр узначаліла Вольга Няфёдава.