Ад ізраільскага ўдару загінула 20 высокапастаўленых іранскіх камандзіраў

У выніку ізраільскай атакі ў Іране загінулі 20 высокапастаўленых камандзіраў, паведамляе Бі-Бі-Сі.

Інфармагенцтва Reuters са спасылкай на ўласныя крыніцы ўдакладняе, што сярод загінулых аказаўся не толькі кіраўнік Корпуса вартавых ісламскай рэвалюцыі (КВІР) Ірана Хасейн Саламі, але таксама і камандуючы ВПС КВІР Амір-Алі Хаджызадэ.

Раней паведамлялася таксама пра гібель начальніка Генеральнага штаба Узброеных Сіл Ірана Махамада Багеры і камандуючага базай СПА КВІР "Хатам аль-Анбія" Галама Алі Рашыда.

Таксама ёсць звесткі пра гібель прынамсі шасці навукоўцаў-ядзершчыкаў, якія маюць дачыненне да ядзернай праграмы Ірана.

Ізраіль нанёс удар па Іране ў ноч на 13 чэрвеня. Асноўныя цэлямі атакі былі вызначаныя ядзерныя аб'екты краіны.

Паведамляецца, што аперацыя рыхтавалася некалькі месяцаў. У гэтым была задзейнічаная разведка Ізраіля.

Атрады спецназа "Масада" размясцілі высокадакладныя зброевыя сістэмы на адкрытай мясцовасці каля батарэй СПА. У ноч атакі іх актывізавалі дыстанцыйна, і яны расчысцілі дарогу ізраільскім самалётам, якія ляцелі бамбіць аб'екты ў Іране.

Частку аб'ектаў іранскай абароны Ізраіль знішчыў ударнымі сістэмамі, "таемна размешчанымі на транспартных сродках". Па апісанні гэта нагадвае ўкраінскую спецаперацыю "Павуцінне", падчас якой былі знішчаныя і пашкоджаныя некалькі дзясяткаў расійскіх самалётаў.

Таксама агенты "Масада" стварылі базу ўдарных дронаў каля Тэгерана. У ноч атакі з яе нанеслі ўдар па пускавых устаноўках ракет "зямля-зямля" на адной з іранскіх базаў.