Ацяпленне ў Мінску пачнуць уключаць паслязаўтра?
Гэта на два тыдні раней за звычайны тэрмін. Але халодны верасень забяспечвае тэмпературу, пры якой неабходна ўключаць ацяпленне.
Паводле нормаў, батарэі пачынаюць цяплець, калі сярэдняя тэмпература паветра пяць дзён трымаецца на ўзроўні +8 градусаў або ніжэй. Для школ, дзіцячых садкоў, медыцынскіх ды іншых сацыяльных устаноў гэты паказчык роўны +10.
“Чаканыя пятыя суткі для жыхароў кватэр наступяць у нядзелю. А калі браць сацыяльныя аб’екты, то сёння ідзе чацвёрты дзень з сярэднесуткавай тэмпературай ніжэй за +10. І пацяплення вышэй гэтай адзнакі не чакаецца да 5 кастрычніка”, — паведаміла “Нашай ніве” галоўны сіноптык Рэспубліканскага гідраметцэнтра Людміла Парашчук.
Калі сярэднесутачная тэмпература апусціцца ніжэй за норму, пачнуцца ўключэнні ацяплення. Спачатку на аб'ектах першай чаргі — сацыяльных, пасля ў кватэрах, а пасля і на астатніх аб’ектах. Аб’екты будуць падключацца па 20% за дзень, то бок, цягам пяці дзён пасля пачатку ацяпляльнага сезона ўсе батарэі пацяплеюць.
Нагадаем, раней паведамлялася, што ацяпленне пачнуць уключаць не раней за 14 кастрычніка.
Фота: xxivek.com.ua.
