Заява аб знікненні Анжалікі Мельнікавай пададзеная ў паліцыю Вялікабрытаніі

Сузаснавальнік фондаў BYhelp і BYSOL Аляксей Лявончык падаў у паліцыю Вялікабрытаніі заяву аб знікненні спікеркі Каардынацыйнай рады Анжалікі Мельнікавай.

Заявы Лявончык падаў у дзве структуры — паліцыю Лондана (Metropolitan Police) і ў Нацыянальнае агенцтва па расследаванні злачынстваў (NCA), якая працуе на ўсёй тэрыторыі краіны. Пра гэта ён напісаў на сваёй старонцы ў Фэйсбуку.

"Я вырашыў вызначыць, ці Анжаліка сапраўды прызямлялася ў ВялікаБрытаніі. Бо мне падаецца вельмі дзіўным, што чалавек, які вылецеў з Польшчы ў іншую краіну, падарожжы паміж якімі дастаткова добра адсочваюцца, проста знік. Паглядзім, што з гэтага выйдзе", — пракаментаваў актывіст у гутарцы з "Белсатам". Калі бліжэйшым часам вынікаў не будзе, ён плануе прыцягнуць да справы прэсу.

Таксама Лявончык плануе падаць заявы ў аэрапортах Лутан і Хітроў, куды магла прыляцець Мельнікава з варшаўскага аэрапорта.

Лявончык дапускае, што яму могуць не паведаміць інфармацыю. Аднак ён разлічвае на большую адкрытасць дзяржструктур з улікам таго, што Мельнікава — вядомая асоба і палітык, які можа быць у небяспецы праз дзеянні рэжыму Лукашэнкі.

Лявончык упэўнены, што знікненне Мельнікавай прымусовае: "Мы маем справу з двума варыянтамі — прымусовы выезд ці забойства". У версію працы Мельнікавай на беларускія спецслужбы ён не верыць — у такім разе яе б даўно паказалі на дзяржаўным тэлебачанні.

Пра знікненне спікеркі Каардынацыйнай рады Анжалікі Мельнікавай ейныя сябры стала вядома 28 сакавіка. Сувязі з ёй няма з 25 сакавіка.