"Добраахвотна не паехала б дакладна". Пагутарылі са знаёмай Анжалікі Мельнікавай

Ужо тыдзень нічога не вядома пра палітычную актывістку і спікерку Каардынацыйнай рады Анжаліку Мельнікаву. За гэты час так і не стала ясна, што адбылося з беларускай і чаму яна не выходзіць на сувязь.

Еўрарадыё звязалася з жанчынай, якая добра ведала Анжаліку з часоў яе жыцця ў Нясвіжы. Мы пераказваем важныя дэталі размовы, ананімізаваўшы асабістыя дадзеныя крыніцы дзеля яе бяспекі.

Пра Нясвіж

— Так, я сапраўды ведаю Анжаліку з дзяцінства. <...> Учора даведалася, што яна знікла, і вельмі турбуюся за яе.

[У Нясвіжы] некаторыя наогул не ў курсе, што Анжаліка знікла. Яны пачулі гэтую навіну ад мяне. Некаторыя заканчваюць размову — баяцца абмяркоўваць, але ў курсе, што Анжаліка знікла.

Ходзяць чуткі, што Андрэй [Мельнікаў, былы муж Анжалікі. — Еўрарадыё] з дзецьмі наогул пераехаў у Нясвіж, але гэта толькі чуткі. Ён быў з дзецьмі ў Нясвіжы — гэта дакладна. У пятніцу ў двары бачылі дзяўчынку-падлетка, магчыма, гэта Анечка — старэйшая дачка [Анжалікі]. Знаёмая не завастрыла на гэтым увагу, бо дзеці часта бывалі ў бабулі Аксаны. Яна іх вельмі любіць і раней дапамагла Анжаліцы з дзецьмі, дзеці заўсёды гулялі ў двары. А ў двары ў іх некалькі сабак і незлічоная колькасць катоў.

Пра сям'ю Анжалікі

— Бацькі Анжалікі даўно ў разводзе. <...> Мама Анжалікі працуе сацыяльным работнікам <...>. [Яна], мне здаецца, рэдка заходзіць у сацыяльныя сеткі, асабліва цяпер. Можа быць, толькі калі ў "Аднакласнікі", але яна не пойдзе на кантакт з незнаёмымі людзьмі.

Еўрарадыё напісала маці Анжалікі і Андрэя Мельнікавых у "Аднакласнікі". Паведамленні былі прачытаныя і пакінутыя без адказу.

— Яны [члены сям'і. — Еўрарадыё] не пойдуць на кантакт з незнаёмымі людзьмі. Не ўпэўненая, што яе мама нешта раскажа. Анжаліка — любімая дачушка і гонар сям'і, але 2020 год усё перавярнуў. Яны проста баяцца, баяцца нашкодзіць Анжаліцы.

Андрэй і Анжаліка пажаніліся па вялікім каханні. Складана сказаць, якія ў іх былі адносіны потым [пасля разводу], але дакладна магу сказаць, што Андрэй вельмі кахаў Анжаліку і не хацеў разводу.

Развяліся яны ўжо ў эміграцыі, і ініцыятарам была Анжаліка. Пасля разводу Андрэй забіраў дзяцей некалькі разоў на адпачынак. І яны як цывілізаваныя людзі змаглі захоўваць сяброўскія адносіны дзеля дзяцей.

Муж спакойна заязджае і выязджае з Беларусі. Яны ў разводзе і не жывуць разам. <...> Маці нічога не расказвала пра новыя адносіны. Гэтая тэма — табу.

Паводле інфармацыі Еўрарадыё, Андрэй Мельнікаў прыцягваўся да адказнасці за пратэсты ў 2020 годзе і трапіў у міліцэйскую базу "Беспарадкі". Аднак трапленне ў базу не гарантуе затрыманне пры вяртанні ў Беларусь, таму толькі на падставе паездак нельга рабіць ніякіх высноваў.

Што магло адбыцца

— Я не думаю, што ў Анжалікі былі планы вярнуцца ў Беларусь. Шчыра перажываю за яе як за родную. <...> Мы, хто блізка ведаў Анжаліку, вельмі перажываем. 

Цяпер складана некаму верыць, але знікла маладая прыгожая разумная жанчына, мы павінны неяк аб'яднацца, ці што [каб яе знайсці]. <...> Божа, толькі б не ў Беларусі яна апынулася! Добраахвотна яна туды не паехала б дакладна.

Яна [Анжаліка] як чалавек разумны папярэдзіла б некага са свайго блізкага атачэння, што, напрыклад, з'язджае адпачываць ці нейкія іншыя планы, але вось так раптам знікнуць — гэта малаімаверна. На Анжаліку гэта не падобна. Не хачу думаць дрэнна — вы разумееце, пра што я.