"Я часта памыляўся ў людзях" — Пазняк пра Паліну Шарэнда-Панасюк

Лідар руху "Вольная Беларусь" Зянон Пазняк прызнаў, што часта памыляўся ў людзях. Прыкладам такой памылкі ён назваў былую палітзняволеную Паліну Шарэнду-Панасюк.

"Я часта памыляўся ў людзях. Я ім давяраў. Людзі гэтыя потым аказваліся шкоднымі. Самы просты прыклад. Я хацеў выратаваць гэтую жанчыну, бо я ведаў, што Паліну Шарэнду-Панасюк давядуць да магілы. Яе даводзілі да гэтага. І я фактычна двойчы звяртаўся да Лукашэнкі вызваліць гэтую жанчыну. Мы апаненты. Я — галоўны яго палітычны апанент. І я пераступаю праз сябе і прашу яго: "Выпусці гэтую жанчыну". Ну, выпусціў. Гэта жанчына пахіхікала з мяне, сказала: "Гэта ўсё чэпуха, хто там Пазняка слухае" і гэтак далей", — расказаў палітык у эфіры Радыё Свабода.

Таксама Пазняк згадаў, што Паліна падпісала паперу аб супрацы з КДБ. Пра гэта яна паведаміла, як толькі апынулася па-за межамі Беларусі, такім чынам дэзавуяваўшы сваё пагадненне. Такія дзеянні ён назваў "самавызначэннем".

Паводле Пазняка, у зняволенні можна падпісваць усялякія паперы, у тым ліку прашэнне аб памілаванні, але нельга — аб супрацы з КДБ. "Падпісваць можна любыя памілоўкі, усё, што яны там просяць. Таму што вас кінулі як закладнікаў, вас незаконна падставілі. І таму на гэта сур'ёзна не трэба звяртаць увагі, калі яны просяць там ім памілоўку напісаць. Грош цана гэтай памілоўцы. Галоўнае выйсці. Але яны вас не выпусцяць. Яны хочуць, каб вы падпісалі супрацоўніцтва з КДБ. Ніколі гэта не рабіце — гэта табу. Гэта закон. Гэтага рабіць нельга", — заявіў палітык.