Вытворцы летась больш за тысячу разоў прасілі пра павышэнне цэн

У 2024 годзе ў органы ўлады паступіла больш за тысячу зваротаў ад вытворцаў з просьбай дазволіць павышэнне цэн. Пра гэта ў каментары дзяржСМІ паведаміў міністр антыманапольнага рэгулявання і гандлю Артур Карповіч.

Чыноўнік заявіў, падтрымку з боку дзяржавы аказваюць "у сапраўды важным выпадку". І прывёў прыклад: "Бо мы разумеем: ёсць аб'ектыўныя прычыны, калі трэба павысіць адпускную цану, каб не загнаць у страты асобнае прадпрыемства або цэлую галіну".

Але папярэдне, маўляў, чыноўнікі павінны пабачыць, што вытворца зрабіў вялікую працу па мінімізацыі сваіх выдаткаў, пастараўся як мага паменшыць тую велічыню, "на якую трэба будзе павысіць цану".

Карповіч паведаміў, што летась чыноўнікі прынялі 572 рашэнні аб павышэнні цэн.

6 кастрычніка 2022 года Лукашэнка пасля нарады аб сітуацыі з цэнамі ў краіне падпісаў дырэктыву № 10 "Аб недапушчальнасці росту цэн". У тым жа кастрычніку выйшла пастанова ўрада №713, якая ўводзіла рэгуляванне цэн на тавары ўсяго спажывецкага кошыка. Пазней з гэтага пераліку выключылі некаторыя групы тавараў, а таксама былі падкарэктаваныя правілы рэгулявання цэн.