Вялікі футбол вяртаецца на мінскі стадыён “Трактар” праз 910 дзён. Фотафакт

10 мая на сталічны стадыён “Трактар” пасля рэканструкцыі вернецца вялікі футбол. У 8-м туры чэмпіянату Беларусі па футболе гледачы змогуць убачыць матч паміж “Мінскам” і “Арсеналам”.

Апошні матч на гэтай арэне адбыўся 12 лістапада 2022 года. Пасля гэтага стадыён закрыўся на перабудову. Ён прылегае да новага Нацыянальнага стадыёна, пабудаванага кітайцамі, і цяпер з’яўляецца часткай архітэктурнага ансамбля. “Трактар” страціў тры трыбуны, але захаваў натуральнае пакрыццё.

Замест кругавых трыбун па перыметры поля, якія змяшчалі 17 600 чалавек, цяпер засталася адна галоўная трыбуна на 5 600 гледачоў.

На стадыёне з’явіліся новыя асветленыя вежы і табло, усталяванае побач з легендарнай “горачкай”, адкуль заўзятары раней назіралі за матчамі без квіткоў. Праз яе праходзіць асфальтаваная дарожка.

Абнавіўся і прылеглы парк 50-годдзя Кастрычніка. Там з’явіліся скейт-парк, пляцоўкі для валейбола і міні-футбола, воркаўт-зона, вулічныя трэнажоры і дзіцячая пляцоўка.

Матч 8-га тура паміж “Мінскам” і “Арсеналам” пройдзе 10 мая а 15:00 на стадыёне “Трактар”.