Вальфовіч абвінаваціў Літву ў тым, што літоўскія фуры не выязджаюць з РБ

Літоўскія грузавікі застаюцца ў Беларусі, бо кіраўніцтва балтыйскай краіны не хоча ісці "на канструктыўны дыялог на палітычным узроўні". Пра гэта дзяржсакратар Савета бяспекі Аляксандр Вальфовіч заявіў пасля дакладу Аляксандру Лукашэнку.

На выходных Вальфовіч сустракаўся з кіроўцамі літоўскіх фур, якім не дазваляюць выехаць з Беларусі. Агулам у нашай краіне, як паведамляецца, застаюцца больш за 1800 машын літоўскіх перавозчыкаў. Лукашэнка адкаментаваў, што "разрульваць" праблему павінны міністэрствы замежных спраў дзвюх краін.

"Мне было даручана паглядзець, якія ў іх ёсць праблемы, растлумачыць ім сітуацыю, што не Беларусь справакавала гэтую абстаноўку, не па віне Беларусі яны засталіся тут. Беларусь гатовая да канструктыўнага дыялогу з усімі сваімі суседзямі на палітычным узроўні. Гэтым павінна займацца Міністэрства замежных спраў", — заявіў Вальфовіч у каментары дзяржаўнаму інфармагенцтву БЕЛТА.

Паводле яго, кіроўцы з разуменнем паставіліся да сітуацыі і нібыта нават дзякавалі Лукашэнку.

Пасля трохтыднёвай паўзы Літва 20 лістапада адчыніла два пераходы на мяжы з Беларуссю. Тым не менш грузавікі з літоўскімі нумарамі, якія затрымаліся ў Беларусі на момант закрыцця мяжы, дагэтуль не могуць пакінуць нашу краіну. Кіраўнік асацыяцыі літоўскіх перавозчыкаў паведамляў, што афіцыйны Мінск патрабуе правесці наконт машын перамовы на ўзроўні міністэрстваў замежных спраў.