Ва Украіне гараць склады боепрыпасаў, эвакуявалі 28 тысяч чалавек (відэа)
Ва Украіне гараць склады боепрыпасаў, эвакуявалі больш за 28 тысяч чалавек (большасць з іх выехалі самастойна). Здарэнне адбылося позна ўвечары 26 верасня ў Каліноўскім раёне Вінніцкай вобласці на тэрыторыі вайсковай часткі (адтуль да Вінніцы 20-25 км). На складах захоўваюцца ракеты да сістэм залпавага агню “Смерч”, “Ураган” і “Град”. Там чутны выбухі. Генштаб Украіны заявіў, што палова складоў была без боепрыпасаў.
Як інфармуе УНІАН, у Вінніцкую бальніцу шпіталізавалі жанчыну з траўмамі. З-за боепрыпасаў, якія разляталіся па наваколлі, загараліся чатыры жылыя дамы, якія ратавальнікі патушылі. У раёне надзвычайнага здарэння спынены рух на аўтатрасе, на чыгунцы, забаронены палёты самалётаў, адключаныя дзве лініі электраперадач. Каля складоў працуюць амаль 700 чалавек, каля паўтары сотні тэхнікі.
Ва ўрадзе Украіны, як і ў Генштабе, не выключаюць, што прычынай здарэння маглі стаць “знешнія фактары”. Інакш кажучы, маецца на ўвазе дыверсія.
