Урад правёў чарговую "карэкціроўку сістэмы рэгулявання цэн"
"Карэкціроўка" адбывалася шэсць разоў / sb.by
Урад правёў чарговую "карэкціроўку сістэмы рэгулявання цэн" у Беларусі. Падпісаная адпаведная пастанова.
Змены закрануць і вытворцаў, і суб'екты гандлю, паведамляе ўрадавая прэс-служба. Адзначаецца, што "ключавая мэта зменаў — павышэнне фінансавай устойлівасці айчынных вытворцаў, ліквідацыя адміністрацыйных бар'ераў узгаднення цэн".
Урадавая пастанова № 713 "Аб сістэме рэгулявання цэн" была прынятая 19 кастрычніка 2022-га. З таго часу "карэкціроўка" яе адбывалася шэсць разоў. Цяперашнія змены ў сакавіку анансавала Міністэрства антыманапольнага рэгулявання і гандлю. Яны былі падрыхтаваны з улікам даручэнняў Аляксандра Лукашэнкі, якія ён даў на нарадзе 28 лютага 2025-га. Лукашэнка патрабаваў напісаць "справядлівую" формулу цэнаўтварэння.
Пакуль жа рэгуляванне коштаў прывяло да дэфіцыту на некаторыя тавары, бо іх актыўна вывозяць з Беларусі ў Расію. Там іх можна прадаць больш выгадна, бо дзейнічае рынкавае коштаўтварэнне.
