Улады засакрэцілі дакумент, які наўпрост уплывае на кашалькі беларусаў

Дакумент, у якім чыноўнікі прапісваюць, калі і якія тавары і паслугі падаражэюць, засакрэчаны ўжо некалькі гадоў.

Гэта так званы "тарыфны сшытак", за які адказвае Міністэрства антыманапольнага рэгулявання і гандлю (МАРГ). Яго, як піша "Зеркало", размяшчалі на сайце МАРГ да 2021 года ўключна. У дакуменце было прапісана планавае павышэнне коштаў на тавары і паслугі, якія рэгуляюцца дзяржавай. Ведамства сачыла, каб усе прытрымліваліся гэтага дакумента. З яго, напрыклад, можна было даведацца, калі падаражэюць цыгарэты, алкаголь, жыллёва-камунальныя паслугі, праезд у грамадскім транспарце, адукацыйныя паслугі, бензін. Паглядзець гэтую інфармацыю мог любы ахвотны.

Але на 2022 год улады не апублікавалі гэты дакумент. Як і ў наступныя гады.

Цяпер МАРГ завяршае распрацоўку тарыфнага сшытка на 2025 год, заявіў кіраўнік ведамства Аляксей Багданаў. "Паводле ўказа кіраўніка дзяржавы інфляцыя не павінна перавысіць 5% — задача даволі складаная, улічваючы, што ў суседзяў на сёння інфляцыя знаходзіцца на мяжы двухзначнага значэння", — патлумачыў міністр.

Пры гэтым ён перакананы, што распрацаваныя ўрадам меры дазволяць забяспечыць выкананне задачы па інфляцыі ў 2025 годзе.

Як вядома, інфляцыю ў Беларусі стрымліваюць адміністрацыйнымі метадамі.

А вось пра адкрытую публікацыю "тарыфнага сшытка" Багданаў не сказаў ні слова.