У РФ прапануюць не караць за забойствы дзеля "традыцыйных каштоўнасцяў"

Людзей, якія ўчынілі забойствы дзеля абароны "маральных каштоўнасцяў", варта вызваляць ад крымінальнай адказнасці. Такую прапанову агучыў кіраўнік Мінюста Расіі Канстанцін Чуйчанка.

Чыноўнік нагадаў, што ў РФ ёсць дзве падставы для вызвалення ад крымінальнай адказнасці, і прапанаваў увесці трэцюю. "У нас на сённяшні дзень вызваляецца [ад крымінальнай адказнасці], калі чалавек дзейнічаў у стане крайняй неабходнасці або ў стане неабходнай абароны, а калі ён абараняў маральныя каштоўнасці?" — перадае moscowtimes.ru выступ Чуйчанкі на Пецярбургскім міжнародным юрыдычным форуме.

Раней Чуйчанка заявіў, што ўмацаванне дзяржаўнасці ў Расіі павінна стаяць вышэй, чым забеспячэнне правоў грамадзян і вяршэнства закона. Ён аргументаваў гэта тым, што "слабая дзяржава ніколі не зможа належным чынам забяспечыць правы нашых грамадзян". А ўмацоўваць дзяржаўнасць, на думку чыноўніка, трэба праз больш жорсткую адказнасць за парушэнне заканадаўства аб замежных агентах.