У рэдакцыях незалежных рэгіянальных СМІ прайшлі ператрусы
Ператрусы ў рэгіянальных СМІ / АНТ
Сілавікі прыйшлі з ператрусамі ў рэгіянальныя СМІ — "Вячэрні Бабруйск", "Бабруйск Інфо", "УзГорак" і "Вольнае Глыбокае". Сюжэт пра гэта з'явіўся ўвечары на тэлеканале АНТ. Паведамляецца, што ператрусы прайшлі яшчэ ў канцы сакавіка — пачатку красавіка.
Допыты рэдактараў рэгіянальных медыя паказалі ў тэлесюжэце. Прапагандыст Ігар Тур паведаміў, быццам выданні вінаватыя ў тым, што атрымлівалі грошы ад нямецкай амбасады "за артыкулы рэкламнага характару, якія праслаўляюць нібыта цудоўную Германію".
Сцвярджаецца, што амбасада Германіі з 2020 года выдаткавала на гэтыя мэты каля 226 тысяч долараў.
Таксама Тур заявіў, што пры ператрусе ў кватэры галоўнага рэдактара "Вячэрняга Бабруйска" Валянціна Сысоя знайшлі "пнеўматычную вінтоўку і пісталет, імітацыйную гранату, візітоўкі ўсякіх немцаў".
