У Польшчы патлумачылі замарозку тэрмінаў разгляду спраў аб міжнароднай абароне

Замарозка тэрмінаў разгляду спраў аб міжнароднай абароне не азначае, што іх разгляд прыпыняецца. Пра гэта паведаміла Упраўленне па справах замежнікаў Польшчы.

Раней стала вядома, што ў Польшчы да 4 сакавіка 2026 года замарожваюцца тэрміны разгляду спраў аб міжнароднай абароне.

У ведамстве заявілі, што справы будуць разглядацца, а новыя заявы на міжнародную абарону будуць прымацца. Але ўпраўленне не абавязанае ўкладвацца ў вызначаныя законам тэрміны. Закон вызначаў, што заяўнік павінен атрымаць адказ не пазней як праз 6 месяцаў з дня падачы заявы, а ў складаных выпадках альбо пры вялікім наплыве заяваў — 15 месяцаў.

Таксама ведамства, як заўважыла выданне MOST, не абавязанае апавяшчаць заяўнікаў, што іх справы не будуць разгледжаныя ў вызначаны тэрмін. Прычым на парушэнне тэрмінаў ці бяздзейнасць органа нельга будзе падаць скаргу. Такая ж практыка дзейнічае ад 2022 года па справах аб ВНЖ.

Польскія чыноўнікі патлумачылі гэтую меру вялікім ростам колькасці заяваў — найперш з боку ўкраінцаў. Замарозка тэрмінаў разгляду ўводзіцца дзеля таго, каб адаптаваць адміністрацыйныя працэдуры да "надзвычайнай міграцыйнай сітуацыі".

"Вытворчасці [па справах] будуць па-ранейшаму весціся настолькі эфектыўна, наколькі гэта магчыма", — заяўляюць у ведамстве.