"У мяне цяпер новае жыццё". Гісторыя сірыйца, які хутка вернецца дадому

Шахаб дапускаў, што зрынанне ўлады адбудзецца яшчэ ў першыя гады рэвалюцыі, у 2011 годзе. Ён сказаў, што гэта было вельмі блізка.

— На жаль, Захад, Ізраіль і Расія вырашылі пакінуць дыктатара-мясніка ва ўладзе. А Італія, Грэцыя, Аўстрыя і іншыя краіны ЕС у апошнія гады наогул былі вельмі блізкія да нармалізацыі адносін з сірыйскім рэжымам.

“Я быў такі шчаслівы, што, здавалася, мог дабегчы да Дамаска”

Калі Асад збег з краіны, Шахаб знаходзіўся ў суседняй з Сірыяй Іярданіі.

— Я акурат быў там на кінафестывалі, таму я гатовы быў ехаць проста ў Сірыю, я быў такі шчаслівы, што, здавалася, мог дабегчы да Дамаска. Я раптам адчуў, што ў мяне ёсць дом. Мне захацелася стаць сведкам гэтых гістарычных момантаў. На жаль, не было магчымасці перасекчы мяжу так хутка.

Але я паеду ў Сірыю ўжо ў сакавіку. Гэта будзе месяц, калі часовы ўрад мусіць перадаць уладу пераходнаму ўраду, які, як мы спадзяёмся, будзе прадстаўляць усіх сірыйцаў, таму нам трэба быць там, каб абараніць дэмакратыю і спыніць любыя спробы манаполіі. 15 сакавіка таксама адзначаецца 14-я гадавіна сірыйскай рэвалюцыі.

Безумоўна, я занепакоены тым, што ісламісты ўпершыню ў сучаснай гісторыі кіруюць маёй краінай — гэта не тое, чаго хацела рэвалюцыя першапачаткова, але цяпер яны — самая магутная сіла ў краіне.

“Горшага за Асада ужо не будзе”

Шахаб верыць, што Сірыя зможа стаць краінай, дзе ніхто не будзе адчуваць сябе прыгнечаным і дзе ўсе будуць паважаць адно аднаго.

— Вельмі нямногія ведаюць, што ў нас шмат культур, рэлігій і моваў, хоць у нас і адносна невялікая краіна. Усе гэтыя гады сям'я дыктатара злоўжывала гэтым, прымушала нас ненавідзець адно аднаго. Цяпер усё змянілася, у нас ёсць рэальны шанец пабудаваць новае грамадства, дзе няма месца радыкалам, дзе ўсе рэлігіі дазволеныя, а нерэлігійныя людзі могуць адчуваць сябе ў бяспецы, дзе жанчыны і мужчыны роўныя, дзе прызнаюцца неарабскія мовы, напрыклад курдская.

Шахаб упэўнены, што з дыктатурай Асада Серыя сапраўды дасягнула дна. Але цяпер найгоршае ўжо ззаду.

— Хачу сказаць ад імені многіх сірыйцаў, што горшага за Асада для Сірыі ўжо не будзе, ніколі! Першы час будзе цяжкім, але цяпер самае галоўнае — раззброіць унутры краіны ўсіх апалчэнцаў, якія здольныя ў любы час справакаваць хаос у Сірыі. Некаторыя з іх прытрымліваюцца радыкальнай ідэалогіі, і дэрадыкалізаваць іх будзе няпроста.

Пасля 14 гадоў эскалацыі сірыйцы хочуць міру, упэўнены Шахаб. Ён заклікае ўсе бакі выкарыстоўваць дыпламатычныя шляхі і даць сірыйцам вырашаць сваю будучыню самім.

— У прыватнасці, Ізраіль бамбіць сірыю з першых гадзін падзення Асада. Яны нанеслі каля 500 авіяўдараў цягам двух дзён [Ізраіль пасля падзення рэжыму Асада наносіў удары па вайсковых аб'ектах, каб знізіць рызыку трапляння зброі не ў тыя рукі. — Еўрарадыё]. Ізраіль цяпер уяўляе сабой самую вялікую небяспеку на Блізкім Усходзе і, магчыма, у свеце, — кажа Шахаб.

Са словаў мужчыны, цяпер у сірыйцаў ёсць магчымасць мяняцца і будаваць новую краіну. І калі людзі будуць адчуваць сябе ў бяспецы і адчуваць свабоду слова, то мільёны сірыйцаў вернуцца дадому, прынамсі часткова.

“Давайце скарыстаем гэты шанец і пачнём новую эру”

Звяртаючыся да сірыйцаў ва ўсім свеце, Шахаб кажа, што людзей паўстагоддзя пазбаўлялі магчымасці быць грамадзянамі на іх уласнай радзіме, але цяпер у нацыі з'явіўся шанец адчуць сябе грамадзянамі і будаваць дзяржаву, якая дазволіць адчуваць сябе ў бяспецы і стабільнасці.

— Давайце скарыстаем гэты шанец і пачнём новую эру для гэтага сапраўды цудоўнага кутка зямлі, якому кожны дарослы сірыец цяпер можа неяк дапамагчы. А грамадзянам іншых краін я б хацеў сказаць, што неўзабаве вы зможаце наведаць Сірыю і адкрыць яе для сябе.

Бяспечная і дэмакратычная Сірыя — гэта перамога для ўсіх нас, дапамажыце, наколькі гэта магчыма.