У Мінску судзілі жанчыну, якая збіла свайго 7-гадовага сына

У Мінску судзілі жанчыну, якая збіла свайго 7-гадовага сына. У яго было шмат ранак, сінякоў і драпін. Гэта заўважылі ў школе. Хлопчык не стаў адмаўляць, што ўдары яму наносіла маці.

Здарэнне адбылося ў Савецкім раёне ў канцы кастрычніка мінулага года. Жанчына заявіла, што сына не біла, а толькі "злёгку ўдарыла яго па ягадзіцах". Як піша пракуратура горада Мінска, бацька хлопчыка не хацеў, каб жонку прыцягвалі да адміністрацыйнай адказнасці. Аднак міліцыя правяла праверку па факце наўмыснага нанясення пабояў дзіцяці. Да справы далучылі фотаздымкі збітага хлопчыка.

"За наўмыснае прычыненне цялеснага пашкоджання, якое не прывяло да кароткачасовага расстройства здароўя" жанчыну аштрафавалі на 126 рублёў.