У Лідскім раёне абрынуліся руіны папулярнай у турыстаў сядзібы
Руіны сядзібы ў Дзікушках / тг-канал "Спадчына"
У вёсцы Дзікушкі ў Лідскім раёне абваліліся руіны сядзібы ХІХ стагоддзя.
"Усё, сядзібы Грабоўскіх у вёсцы Дзікушкі Лідскага раёна больш няма ў тым выглядзе, які палюбіўся аматарам даўніны — Vandra паведаміў, што за некалькі гадзін да іх прыезду абрынуўся паркавы фасад з франтонам і калонны порцік", — піша тг-канал "Спадчына".
У тг-канале адзначаюць, што фасад шмат гадоў "проста вісеў у паветры, невядома якім цудам утрымліваючыся ад абвальвання".
Дарэчы, у 2022 годзе актывісты звярнуліся ў лідскі райвыканкам з прапановай правесці першасную кансервацыю рэштак сядзібы. Прапаноўвалася закласці цэглай праёмы і выпаўшы прасценак на першым паверсе, каб зберагчы сядзібу ад далейшага разбурэння. "Рашэнне, якое не патрабуе ніякіх грошай — куб любой цэглы, цэмент і дзень працы будаўніка", — адзначае "Спадчына".
Аднак лідскія чыноўнікі ў адказ паведамілі, што такі варыянт кансервацыі "не мае права на існаванне, бо можа нанесці яшчэ большы ўрон культурнай каштоўнасці".
